ಕನ್ನಡ ರಾಜ್ಯೋತ್ಸವ: ಏಕತೆಯ ಹಬ್ಬ

ನಮ್ಮೆಲ್ಲರ ಮನದ ಹಬ್ಬ, ನಾಡಿನ ಗೌರವದ ಸಂಕೇತ, ಕನ್ನಡ ರಾಜ್ಯೋತ್ಸವವನ್ನು ಪ್ರತಿ ವರ್ಷ ನವೆಂಬರ್ 1 ರಂದು ಸಡಗರ ಸಂಭ್ರಮದಿಂದ ಆಚರಿಸಲಾಗುತ್ತದೆ. ಇದು ಕೇವಲ ಒಂದು ದಿನದ ಆಚರಣೆಯಲ್ಲ, ಬದಲಿಗೆ ನಮ್ಮ ಕರ್ನಾಟಕ ರಾಜ್ಯದ ಐತಿಹಾಸಿಕ ಏಕತೆ, ಕನ್ನಡ ಭಾಷೆಯ ಶ್ರೀಮಂತಿಕೆ ಮತ್ತು ಕನ್ನಡಿಗರ ಸಾಮರಸ್ಯವನ್ನು ಸಾರುವ ಮಹೋನ್ನತ ಹಬ್ಬವಾಗಿದೆ. 1956 ರ ನವೆಂಬರ್ 1 ರಂದು ವಿವಿಧ ಪ್ರಾಂತ್ಯಗಳಲ್ಲಿ ಹಂಚಿಹೋಗಿದ್ದ ಕನ್ನಡ ಮಾತನಾಡುವ ಜಿಲ್ಲೆಗಳು ಮತ್ತು ಪ್ರದೇಶಗಳನ್ನು ಒಗ್ಗೂಡಿಸಿ, ಕರ್ನಾಟಕ ಎಂಬ ಏಕೀಕೃತ ರಾಜ್ಯವನ್ನು ಅಸ್ತಿತ್ವಕ್ಕೆ ತಂದ ದಿನವಿದು. ಇದು ಸಮಸ್ತ ಕನ್ನಡಿಗರ ಬಹುದಿನದ ಕನಸು ಮತ್ತು ಏಕತೆಯ ಹೋರಾಟದ ನೈಜ ವಿಜಯವಾಗಿದೆ.

ಏಕೀಕರಣದ ಇತಿಹಾಸ: ಕನ್ನಡದ ಕನಸು 

1956 ರ ಪೂರ್ವದಲ್ಲಿ ಕನ್ನಡ ಪ್ರದೇಶಗಳು ಹೈದರಾಬಾದ್, ಬಾಂಬೆ ಮತ್ತು ಮದ್ರಾಸ್ ಪ್ರಾಂತ್ಯಗಳಂತಹ ಬೇರೆ ಬೇರೆ ಆಡಳಿತಾತ್ಮಕ ಪ್ರದೇಶಗಳಲ್ಲಿ ಹಂಚಿಹೋಗಿದ್ದವು. "ಎಲ್ಲ ಕನ್ನಡಿಗರು ಒಂದೆಡೆ, ಒಂದೇ ರಾಜ್ಯದಡಿ ಇರಬೇಕು" ಎಂಬುದು ಜನರ ಪ್ರಮುಖ ಮತ್ತು ಅಚಲ ಬೇಡಿಕೆಯಾಗಿತ್ತು. ಇದರ ಫಲವಾಗಿ 'ಸಮ್ಯುಕ್ತ ಕರ್ನಾಟಕ ಚಳವಳಿ' ಎಂಬ ಮಹತ್ತರ ಹೋರಾಟದಲ್ಲಿ ಸಾವಿರಾರು ಜನರು ಪಾಲ್ಗೊಂಡು ತ್ಯಾಗ ಮಾಡಿದರು. ಈ ಮಹೋನ್ನತ ಹೋರಾಟದ ಫಲವಾಗಿ, 9 ಕನ್ನಡ ಭಾಷಾಭಿಮಾನಿ ಜಿಲ್ಲೆಗಳು ಸೇರಿ ನಮ್ಮ ಕನಸಿನ ರಾಜ್ಯ ಕರ್ನಾಟಕ ಉದಯಿಸಿತು. ಈ ದಿನವು ಕನ್ನಡಿಗರಿಗೆ ತಮ್ಮ ಗುರುತು ಮತ್ತು ಪ್ರಾದೇಶಿಕ ಗೌರವವನ್ನು ಮರುಸ್ಥಾಪಿಸಿದ ಸುದಿನವಾಗಿದೆ.

ಕನ್ನಡ ಭಾಷೆಯ ವೈಭವ ಮತ್ತು ಪರಂಪರೆ 

ಕನ್ನಡ ರಾಜ್ಯೋತ್ಸವವು ನಮ್ಮ ಕನ್ನಡ ಭಾಷೆಯ ಅದ್ಭುತ ಪಯಣವನ್ನು ನೆನಪಿಸುತ್ತದೆ. ಕನ್ನಡವು ದ್ರಾವಿಡ ಭಾಷಾ ಕುಟುಂಬದ ಅತ್ಯಂತ ಪುರಾತನ ಮತ್ತು ಶ್ರೀಮಂತ ಭಾಷೆಗಳಲ್ಲಿ ಒಂದಾಗಿದೆ. ವಿದ್ವಾಂಸರ ಪ್ರಕಾರ, ಕನ್ನಡಕ್ಕೆ ಸುಮಾರು 2500 ವರ್ಷಗಳ ಇತಿಹಾಸವಿದೆ. ಕ್ರಿ.ಪೂ. ಮೂರನೇ ಶತಮಾನಕ್ಕೂ ಮೊದಲೇ ಕನ್ನಡವು ಜನಪದದಲ್ಲಿ ಮಾತಿನ ಭಾಷೆಯಾಗಿ ಸ್ಥಿರಗೊಂಡಿರಬಹುದು ಎಂಬುದಕ್ಕೆ ಅಶೋಕನ ಕಾಲದ ಶಾಸನಗಳಲ್ಲಿಯೂ ಕನ್ನಡ ಪದಗಳ ಉಲ್ಲೇಖಗಳು ಸಿಗುತ್ತವೆ.

ಕನ್ನಡ ಭಾಷೆಯ ವಿಕಾಸವನ್ನು ಸ್ಥೂಲವಾಗಿ ಮೂರು ಪ್ರಮುಖ ಘಟ್ಟಗಳಲ್ಲಿ ವಿವರಿಸಲಾಗುತ್ತದೆ:

  ಹಳಗನ್ನಡ (ಕ್ರಿ.ಶ. 450–1200): ಈ ಕಾಲಘಟ್ಟದ ಮೊದಲ ಕನ್ನಡ ಪೂರ್ಣ ಶಿಲಾಶಾಸನವಾಗಿ ಐದನೇ ಶತಮಾನದ 'ಹಲ್ಮಿಡಿ ಶಾಸನ' ಪ್ರಸಿದ್ಧವಾಗಿದೆ.

  ನಡುಗನ್ನಡ (ಕ್ರಿ.ಶ. 1200 –1700)

  ಹೊಸಗನ್ನಡ (ಕ್ರಿ.ಶ. 1700 ರಿಂದ ಮುಂದುವರಿದಿದೆ)

  ಕನ್ನಡ ಸಾಹಿತ್ಯವು ಲಿಪಿ ಮತ್ತು ಭಾಷೆಯ ಬೆಳವಣಿಗೆಯೊಂದಿಗೆ ಬೆಳೆದು ಬಂದಿದೆ. ಪಂಪ, ರನ್ನ, ಕುಮಾರವ್ಯಾಸ, ಬಸವಣ್ಣ ಮತ್ತು ಶರಣರು ಈ ಪರಂಪರೆಯನ್ನು ಶ್ರೀಮಂತಗೊಳಿಸಿದ್ದಾರೆ. ಈ ನಮ್ಮ ನಾಡು ಕುವೆಂಪು, ದ.ರಾ. ಬೇಂದ್ರೆಯಂತಹ ಜ್ಞಾನಪೀಠ ಪ್ರಶಸ್ತಿ ವಿಜೇತ ಕವಿಗಳನ್ನು ಕೊಟ್ಟ "ಕಸ್ತೂರಿ ಕನ್ನಡ ನಾಡು" ಎಂದು ವಿಶ್ವಮಟ್ಟದಲ್ಲಿ ಗುರುತಿಸಿಕೊಂಡಿದೆ. ಸಾರಾಂಶವಾಗಿ, ಕನ್ನಡ ಭಾಷೆಯು ಕೇವಲ ಮಾತಿನ ಆಧಾರವಲ್ಲ, ಅದು ನಮ್ಮ ಬದುಕಿನ ಸ್ಪಂದನೆ, ಇತಿಹಾಸ ಮತ್ತು ಸಂಸ್ಕೃತಿಯ ಮೂಲಧಾರೆಯಾಗಿದೆ. 2008 ರಲ್ಲಿ ಕನ್ನಡಕ್ಕೆ 'ಅಭಿಜಾತ ಭಾಷೆ' (Classical Language) ಎಂಬ ಮಾನ್ಯತೆ ದೊರಕಿದ್ದು, ಅದರ ಪುರಾತನ ಹಿರಿಮೆಗೆ ಮತ್ತೊಂದು ಕಿರೀಟಪ್ರಾಯವಾಗಿದೆ.

ರಾಜ್ಯೋತ್ಸವದ ಆಚರಣೆ ಮತ್ತು ಸಂಸ್ಕೃತಿಯ ವೈಭವ

  ರಾಜ್ಯೋತ್ಸವದಂದು ನಮ್ಮ ರಾಜ್ಯದಾದ್ಯಂತ ಅಪಾರ ಉತ್ಸಾಹ ತುಂಬಿರುತ್ತದೆ. ಎಲ್ಲಾ ಸರ್ಕಾರಿ ಕಚೇರಿಗಳು ಮತ್ತು ಶಿಕ್ಷಣ ಸಂಸ್ಥೆಗಳಲ್ಲಿ ನಮ್ಮ ಹೆಮ್ಮೆಯ ಕೆಂಪು-ಹಳದಿ ಬಾವುಟವನ್ನು ಹಾರಿಸಲಾಗುತ್ತದೆ . ಇದು ಕೇವಲ ಬಾವುಟವಲ್ಲ, ಕನ್ನಡಿಗರ ಸ್ವಾಭಿಮಾನದ ಸಂಕೇತ. ದಿನವಿಡೀ ಸಾಂಸ್ಕೃತಿಕ ಉತ್ಸವಗಳು, ನೃತ್ಯ, ಸಂಗೀತ, ನಾಟಕ ಮತ್ತು ಭಾಷಣ ಕಾರ್ಯಕ್ರಮಗಳು ನಡೆಯುತ್ತವೆ.

ಕರ್ನಾಟಕವು ಸಾಹಿತ್ಯ, ಕಲೆ ಮತ್ತು ಸಂಗೀತದ ಸಮೃದ್ಧ ಪರಂಪರೆಯನ್ನು ಹೊಂದಿದೆ. ಯಕ್ಷಗಾನ, ಭರತನಾಟ್ಯ, ಜನಪದ ಕಲೆಗಳು, ಕರ್ನಾಟಕ ಸಂಗೀತ ಮತ್ತು ದಾಸಸಾಹಿತ್ಯ ನಮ್ಮ ಆತ್ಮವನ್ನು ಪ್ರತಿಬಿಂಬಿಸುತ್ತವೆ. ರಾಜ್ಯೋತ್ಸವವು ಈ ಸಮೃದ್ಧ ಪರಂಪರೆಯನ್ನು ನೆನಪಿಸಿ, ಬಾಂಧವ್ಯಗಳ ಪರಿಮಳವನ್ನು ಹೆಚ್ಚಿಸುವ ಹಬ್ಬವಾಗಿದೆ.

ನಮ್ಮ ಜವಾಬ್ದಾರಿ 

  ಕನ್ನಡ ರಾಜ್ಯೋತ್ಸವ ಕೇವಲ ಒಂದು ಉತ್ಸವವಲ್ಲ; ಇದು ನಮಗೆ ನಮ್ಮ ಭಾಷೆಯ ಮಹತ್ವ, ಏಕೀಕರಣದ ಹೋರಾಟ ಮತ್ತು ಮುಂದಿನ ಪೀಳಿಗೆಗೆ ಕನ್ನಡವನ್ನು ತಲುಪಿಸುವ ಜವಾಬ್ದಾರಿಯನ್ನು ನೆನಪಿಸುತ್ತದೆ. ಇಂದು ಕನ್ನಡವು ವಿಶ್ವ ಸವಾಲುಗಳನ್ನು ಎದುರಿಸುವ ಅಂತರರಾಷ್ಟ್ರೀಯ ಭಾಷೆಯ ದಿಕ್ಕಿನಲ್ಲಿ ಬೆಳೆಯುತ್ತಿರುವುದು ಹೆಮ್ಮೆಯ ವಿಷಯ.

"ಬೇರೆ ಭಾಷೆ ಕಲಿಯೋಣ, ಆದರೆ ಕನ್ನಡ ಉಳಿಸೋಣ" ಎಂಬ ಮಾತು ಸದಾ ನೆನಪಿನಲ್ಲಿರಲಿ. ಪ್ರತಿಯೊಬ್ಬ ಕನ್ನಡಿಗನೂ ತನ್ನ ತಾಯ್ನುಡಿ ಕನ್ನಡವನ್ನು ಮಾತಿನಲ್ಲಿ, ಆಚರಣೆಯಲ್ಲಿ, ಮತ್ತು ಬಾಳಿನಲ್ಲಿ ಉಳಿಸಿ, ಬೆಳೆಸಬೇಕು.

“ ಸಿರಿಗನ್ನಡಂ ಗೆಲ್ಗೆ, ಸಿರಿಗನ್ನಡಂ ಬಾಳ್ಗೆ ”

ಜೈ ಕರ್ನಾಟಕ ಮಾತೆ.

-ವಂಶಿ ಐ. ಭಟ್ಟ್ 

ಸಬ್-ಎಡಿಟರ್ ಕದಂಬ ಪತ್ರಿಕೆ